Klèb Deba Boudon an fè pati de yon rezo 11 klèb, Programme Initiative Jeunes (PIJ) nan FOKAL ap jere. Nan sousi pou Klèb la kontinye avèk misyon li ki se ankadre jenn yo nan aprann epi ede yo devlope lespri kritik, kapasiste pou yo byen mennen rechèch dokimantè pou kont yo epi fason pou yo pran lapawòl devan moun, manm klèb la kontinye òganize yon ansanm fòmasyon avèk kozri sou yon dividal sijè enpòtan pou jenn nan zanviwon klèb la. Tankou sila te fèt nan kòmansman mwa fevriye a ak fòmasyon epi diskisyon sou KONSANTMAN ki kaba samdi 19 fevriye ki sot pase la.
Pandan mwa janvye pou rive 12 fevriye 2022, klèb deba Boudon an te òganize yon ansanm aktivite nan memwa viktim goudougoudou yo (12 janvye 2010 avèk 14 dawout 2021). Klèb la reyalize pandan 4 semèn plizyè rankont pou sansibilizasyon ak fòmasyon pou salye viktim tranblemantè yo, an patenarya ak Bibliyotèk Sant Kiltirèl Pyepoudre.
Nan menm peryòd sila a, klèb la aksyante rekritman li e akeyi anviwon 50 nouvo manm nan : (Lycée Marie Jeanne, Elie du Bois, École Congréganiste Christ-Roi fille de Marie, Lycée des jeunes filles, Collège le Normalien, Lycée Firmin epi plase 6 selil deba nan kèk lekòl. Chak selil sila yo reyini nan lè pa yo). Rankont klèb yo fèt chak samdi ant 1nè ak 4trè nan lapremidi nan lokal Bilbiyotèk Pye Poudre. Se yon espas aprantisaj ak devlopman pèsonèl.
Nan klèb deba Boudon, menm jan nan tout lòt klèb nan Rezo PIJ la, deba yo se yon ranpa pou pratik demokrasi ak ranfòsman kapasite endividyèl nan aprantisaj youn ak lòt. Espas sila yo louvri pou tout moun ant 3zyèm segondè ak filo nan 11 klèb ki repati sou tout peyi a…
Katriyèm nimewo revi DO KRE I S la lanse nan peyi Lafrans jou madi ki te 12 oktòb la, nan kad 5e edisyon festival Le Mois Kréol. DO KRE I S se yon inisyativ Association vagues Littéraires ki soti chak ane, kote chak nimewo prezante sou yon tèm. Depi li kreye nan lane 2017, li rasanble kreyasyon nan domèn literati osinon kreyasyon nan lòt domèn la, men tou li charye refleksyon kritik sou la, literati ak kesyon lang, 3 enstriman ki simante sosyete a.
Nouvo nimewo sa dedye ak tematik MAK, ak yon omaj patikilye pou gran powèt ki soti nan zile La Reyinyon, Boris Gamaleya (1930-2019).
Nou envite ou dekouvri pwojè Dwa Moun konpayi Bazou fè ki se LIMINASYON. Se yon albòm 16 mizik ki reyini plis pase yon douzèn atis, nan sektè lakilti an Ayiti. Liminasyon abòde tèm tankou idantite kilritèl, memwa zansèt yo, jistis, rezistans, angajman sitwayen, elatriye. Li denonse vyolans ki base sou sèks moun, sistèm patriyaka a, entolerans ak lòt vyolasyon dwa fondamantal moun.
LIMINASYON se yon rezilta yon travay rechèch ak kreyasyon nan lide fè pwomosyon dwa moun atravè mizik, e sitou mizik ki lye ak vodou.
Albòm LIMINASYON disponib sou tout plafòm mizik tankou Itunes, Deezer, Diskòb Mizik, Spotify, Youtube music, Amazon music depi 29 dawout 2021 an.
Albòm sa jwenn sipò pwogram Education Citoyenne FOKAL la, nan kad pwojè AJULIH (Accès à la justice et lutte contre l’impunité), Avocats Sans Frontières Canada ap mennen, gras ak finansman Affaires Mondiales Canada.
Gade fim dokimantè sou kreyasyon pwojè a
Legba, youn nan tit sou albòm nan, genyen tou yon videyoklip ki disponib, dapre lide Samuel Suffren ki reyalize li tou KITFILM.
