Apre plizyè mwa travay, moman an rive pou nou dekouvri gayan premye edisyon « Konkou nasyonal tèks ak ilistrasyon an kreyòl ayisyen pou literati jenès » la! Enstiti Siperyè Fòmasyon, Rechèch ak Inovasyon nan Edikasyon (InnovEd-UniQ), yon estrikti akademik nan Inivèsite Quisqueya, ap òganize seremoni final la pou remèt pri bay gayan yo nan twa kategori: Kont, Resi kout ak Bann desine (BD).
Atravè konkou sa a, InnovEd-UniQ vle ankouraje kreyasyon tèks orijinal an kreyòl ayisyen, dekouvri nouvo talan epi bay pi bon travay yo chans pou rive jwenn timoun yo gras ak yon pwosesis editoryal serye.
Randevou a fikse pou samdi 7 novanm 2026, apati 10è nan maten, nan sal CCC, nan Inivèsite Quisqueya. Si nou pa kapab prezan, n ap ka suiv seremoni an sou entènèt, avèk kòd QR ki sou afich la.
Fondasyon Konesans ak Libète – FOKAL, youn nan patnè konkou a, felisite tout gayan yo epi remèsye tout moun ki te patisipe yo. Li salye tou angajman InnovEd-UniQ nan devlopman kreyasyon literè ak ilistrasyon an kreyòl ayisyen.